Jednom davno, prije skoro 100 godin, rodilo se dvoje dice. Ispod stina čvrstih ka žeje in materine da in puti budu čisti i bez vitra, ispod stare tvrđe Klisa ponosita. Luka je bija prava zvir. Nije ga resila visina ni onda, ni pod stare dane, ali mu je srce bilo kano tvrđa Kliška veliko. I veće. Mater ga je rodila doma, uz pojatu. Dilija je život su dvi sestre i jednin braton, s kojin se volija i kara dok ih smrt nije rastavila. Skupa su gradili, radili.....vinograde sadili, dicu gojili, a ka pas i maška su se jarcali. Kako in se oni gori naruga kad su na kraju i žene s istin imenon oženili. Nevenku iz Kućina.....i Nevenku iz Klisa.

E ova druga, ća je mater rodila doma u po brda, ispod tvrđe ćipo, to je ota Nevenka koju san ja uvik volila i oću je volit dok buden volit mogla.

Nevenka je imala 20 godina kad su se upoznali, i već se po mistu šoto šuškalo kako je stara cura.... asti boga, deboto švora. Ali ona je radila sve po svoju i kako je ona tila. Kad se pristala udat za onega Luku ća san van spomenila maloprije, jemala je 22 i bolila je nju pipa ća ko misli o tome. Ispratija je cili klis lipu Nevenku. Govorila je da je svirala harmonika i da su je prosuli cvićen ka krajicu. A ona se splela, obukla niku lipu veštu ća je sašila od koltrine i sritna je pristala dilit pjat i posteju s Lukon, koji je, kako mi je pripovidila, svira trubu ka niko na svitu.

Živili su u Solinu. Dobili troje dice. Sina Josipa, ćer Maricu i ćer Sanju, koja in se - rekla mi je Nevenka - nikako zaletila.  Resla su dica. Kako to već gre, dobili svoju dicu, utirali svoje pute. Luka  i Nevenka došli su u neke sridnje godine kad in je tribalo bit najlipje.

Ali onda se nesrića nadvila nad njih. Nevenka je imala veliku nesriću  u 50 i nekoj i ostala invalid. Udrilo je auto. Jedva je odila na noge posli, ali je odila. Nakon pustih operacija i muka priživila je i bila nikako još jača negoli prije.

Nakon te nesriće Nevenka je živila još 30 godina, bez da je mogla na noge niz Solin, bez da je mogla sama igdi osin do kokoš skupit jaja dikod.

Znala bi dikod upalit sviću za stolon i govorit kako je u svima nama svitlo i ća ima veze kakvo nan je tilo.

Luka je partija nikako na brzinu. Nije se puno patija. Ima je skoro 80 godin. Cili je život pušija  i volija je gucnit crno iz demižane u svojoj konobi. Kara bi se s menon": pa šta, - reka bi. - Moj dida Špiro pušija je od svoje četrnajste, a umra je u 95-oj jer ga je udrilo auto. I zato mi ne popuj mala."

Nevenka je još šest godin poza njega bila s nama. Lipa Nevenka s Klisa ponosita. Svakin našin susreton zatakla bi mi jedno pero u krila koja je jedina na svitu u meni vidila. Anđelon me zvala. Ijadu me puta blagoslovila, ijadu me puta pojubila i lipon riči darovala. Ijadu me puta u molitvi čuvala i ukorila kad je tribalo i učinila mi stvarnim ovi život. Rekla mi je neka ćutin sve ća jeman ćutit. I bis i sriću i jubav i strast. I neka se deren i plešen i pleten i kuvan. I rekla mi je da vridin taka kakova jesan, jerbo da me takovu zamislija Bog. Rekla mi je neka ne ravnan rice jer će tako svit vidit s kin jemaju posla. Rekla mi je neka ćuvan mater i sestru jer su mi one i zlato i tamjan. A kad san rodila, ja - njena prva unuka, moga Roka - njenog prvog praunuka bila su joj krila ka u pauna. U ijadu koluri. Najveća na svitu. Lipa moja Nevenka s Klisa ponosita.

Srce je izdalo u 82.oj. Srce diteta u satranome tilu.  Nisan je još oplakala,i mislin da nikad neću  jer ona je meni živa. Evo je ovod, u svakoj mojoj rici, u svakon mom dišpetu i suzi. U svakoj je mojoj molitvi zanavik.

Pa joj zapalin sviću i sitin se da je svitlo u svima nama pa ća jema veze kako nan je tilo.

Ne odin joj na grob jer me to puno boli i nije mi nikako tamo. Ne more je stina pokrit. Ne tu vatru, ne tu jubav, ne nju... Danas san odila. Odnila joj anđela misto cvita i isplakala niki potok od kojega san još slana i ja i duša mi cila. Pa san se zagledala nikako u sebe i ćutila je kako mi se smije i govori: ne plaći anđele moj.... i ne ravnaj rice.

Lipa moja Nevenka s Klisa ponosita.


KOMENTARI: