IZ KANTUNA O SVEMU, SVAČEMU I SVAKOME
Sićan se, još dok sam bila dite, kako bi mi u ovo doba godine već mirisalo lito. Lagana trema pred nadolazećom sezonom kupača, promatrača, igrača.

Živilo se lipo. Mater i otac imali bi godišnji, kuvala se domaća šalša, ajvar. Riba na gradele svako malo, a poza sunca sili bi sa susidima iza kuće i uz ćakulu zapivali. Je, bi se dikod i iskarali i derali se ka divjaci kad ne bi znali objasnit svoju kontru.

Mirisa mi je život.
I mater i otac i sestra. I svi oni s kojima san resla bili su mi srića. Ništo ča san disala i ča mi je punilo prsi životon.
I susidi i tete iz male butige od spize i šporki balun za graničara i stari orij na koji smo se verali i padali i didine beštime.....bili su mi srića.

Sićan se punih plaža, toliko punih da nisi ima di stavit šugaman. I mirisa peciva na plaži oko 6 uri. Mirisa Copertona za sunčanje pomišanim sa mirison lažine i onih nikih šampona ča smo ih onda gledali samo na televiziji, a turisti bi na plaži njima prali kose....a ja ka dite, u čudu rekla bi materi da oću i ja, pa bi mater popizdila i rekla da san vlajina.

Sićan se da se mater veselila kad bi i završija godišnji, vračala se radit di joj je bilo lipo, di je imala prave kolege i prijatelje i sva radnička prava. I da je otac volija odit na posal jer je donosija plaću i u dva ipo bi dolazija doma.
A onda bi bili vikendi, samo naši. Pa bi familijarno u brdo. Nije nas bilo straj ubrat kupine po putu, ni trišnje, nismo mislili o prskanju, trovanju, ni da će nan ko zamirit.

Prije spavanja,mater je imala uvik vrimena za pojubac, a pape za priču prid laku noć. A ja san uvik ka starija sestra objašnjavala mlađoj kako nima straja i sve da je kako triba.

Danas mi miriše straj......i ništo ča mi nikako nije lipo.

Sve je nikako posivilo....nima više tega vonja....ni takovih susidi,ni takovih posli. Nima takvoga šušura od sriće maloga čovika. Samo straj niki u judima. Samo pitanja....i sjećanja. I možda još tu i tamo nekakva nadanja da san se ja to samo priladila, a svit je i dalje onako dobar i lip.....samo ga ja drugačije čutin u kostima.


KOMENTARI: