Par dan pri govorilo se tako po našoj rivi kako će brod doć u gornja sela oli kako, ne daj Bože, nikako neće doć. Još u sedmi misec došli su ljudi iz Splita i za tu priliku stavili lanternu na glavinu o porta kako brod ne bi udrija u kraj. Moglo bi se dogodit da kapetan o broda kad čuje u kakvo lipo misto dolazi, od puste sriće i veselja, koju i popije. Za vi svjetionika nikor više ne može reć kako smo obični vlaški grad.

 Bilo, kako bilo, brod je u zadnju naumija doć u starosejski porat. Di i neće kad je turistima najkraće staron kaštelanskon ceston doć do Palaca. To ča su ležeći policajci stavljeni po cilin Kaštilin nima veze jer turistima je ostavljen prolaz put Valova igrališta. Je, je lipo su to smislili. Nije potriba trošit pineze na puste putokaze i sinjale po kojin bi turisti znali di gredu. Malo nji zna govorit, a kamoli čitat po našu. Zamislite kako bi to bilo kad bi niki Talijan mora čitat PRAVAC Hotel Palac. Nebi se čovik snaša, a ovako samo ide tamo di može vuč kufer. Put Novoga ne može, put Lušića ne može. Ostaje mu slobodno jedino put Valova igrališta i za koju uru sigurno je prid recepcijon. Kad tako sataren dođe u otel i leže na posteju neće ni ćutit kad ga ubode koja šušta iz štramca. Na sve se mislilo nema šta.

Kad je brod povirija na vrata o Marjana počela je svirat limena glazba. Valjalo je provat himnu.
Kad san na čelu muzike vidija poznatoga dirigenta u prvi mi se momenat učinilo da su note od one stare, PO ŠUMAN I GORAN.  E ma ovi je put svirala prava "Lipa naša domovino". Bile su tu i naše mažuretkinje.
Prisidnica turizma u Kaštilin donila je par sići garifuli jer nikor nije zna koliko će furesti doć. Ča je, je, u ovoj je turi, došlo čak 120 gostiju. Niki su odma počeli računat koliko je to spavanja za Kaštila i pritvarat u marke i dolore. Izašlo je to nešto puno pa nije bilo jasno jesu li tu uračunali i ona poslinpodnevna spavanja kad čovik poslin obida gre malo upočinit.
Malo su se razočarali kad je u sljedećoj turi doša samo jedan i to niki švercer iz Italije. U zadnju je tribalo užgat svitlo kako bi turisti mogli po komodu ugazit na naš lipi porat.
"Pali sviću" vikali su izaslanici prisidnika republike. Je je došli su i oni. To je bila delegacija iz HDZ-a jer kako bi to bilo da su turisti došli a nidir nikoga iz politike. Cili su događaj pratili snimatelji HTV-a. "Pali sviću" opet se čulo. Ma nećete mi virovat ali nidir ni jednoga jedinoga svitla osim ča je Brčeta upalija cigaret pa su neki mislili da to on lagano zajebaje. "Maškare su skinile parangal", čulo se u po glasa. Sve je parilo ka da se nikor smije i škopija, a neda se gušta jer nikor ništa ne zna. Je je. Istina je da su drugovi iz Poklada skinili parangal o letrike jer cilo je lito visija po portu i moglo se dogodit da propade ili još gore da završi di nebi smija.

Ljudi nisu znali da će brod doć. O ton velikon događaju za naše malo misto saznalo se isti taj dan iz Slobodne Dalmacije. Da se na vrime znalo sve bi plancalo o pustoga svitla. Bilo bi i vatrometa, ma ko zna ča bi sve bilo, a ovako je uz crni mrak turiste dočekalo par mištani, drugovi iz HDZ-a i Milka. Kako koja Milka. A ko ne zna Milku. Mavala je turistima, ča su se iskrcavali, i to di ćeš lipše nego kiticon o tamarina. Uz limenu glazbu je plesala, jer in je tila pružit cili ugođaj. Nije to bija Šotić oli koji od stari kaštelanski plesov, ali nije to važno.
Kad je Milka počela pomalo dizat suknju onda je kulturno zamoljena od strane prisidništva turističke zajednice, kako je to još rano i da za to ni misto ni vrime.

Svaki je turista dobija na dar po gariful ča mu ga je uručila cura u prilipoj kaštelanskoj nošnji. Bon žur, Bien Venido, svi su govorili. Ma ajde k vragu ne triba meni gariful, reka je oni ča je veza cimu. A ča se može u ton su mraku svi parili turisti. Brčeta je donija banak kako bi se turisti počastili pravin kaštelanskin pršuratan i suvin smokvan. Mislilo se kako tribaju kušat kaštelansku rakiju. Sva je srića da je bija mrak pa ga furešti nisu mogli vidit.
Drugovi iz maškar još prije nego ča je brod povirija od Marjana, pojili sve pršurate i popili rakiju, a ko je lud da jide suve smokve u sri osmoga miseca. Limena je glazba udrila po svoju, a mažuretkinje su otišle i prije vrimena. Nisu mogle čekat. One ča su malo starije otišle su još u devet uri. Jemale su važnijega posla.

Na kraju je, ipak, sve prošlo lipo. Turisti su se nanoge uputili put Palaca i Resnika, snimatelji HTV-a nastavili su snimat u Gaje, a Kevo je taksi vratija odakle je doša. K vragu lito i turisti - reka je na kraju.

Komentari:

Poslao Gost_124 dana 2005-04-20 20:55:14

Poslao Gost_27 dana 2008-03-14 19:17:35

Poslao Gost_167 dana 2008-04-11 12:14:21 RAZLIČITO

Dodaj komentar
Ime:	Gost
Naslov/Ime:
BBCode:
Komentar: